සේවක අර්ථසාධක අරමුදලෙන් 20% ක් කොරෝනා සහන සඳහා..

FB_IMG_1585640992207

සේවක අර්ථ සාධක අරමුදල යොදා ගෙන වැඩ කරන ජනතාවට සහන සැලසීමේ යෝජනාවක් අග්‍රාමාත්‍ය ආර්ථික උපදේශක අජිත් නිවාඩ් කබ්රාල් මහතා ඉදිරිපත් කර තිබේ.

සේවක අර්ථසාධක අරමුදලේ සමාජිකයින්ට සිය තැන්පතුවලින් 20 %ක් ලබාදිය යුතු බව ඔහුගේ එම යෝජනාවයි.

අජිත් නිවාඩ් කබ්රාල් මහතාගේ මෙම යෝජනාව ඊයේ පුවත් පත් කිහිපයක් වාර්තාකර තිබිණ.

එම වාර්තාවලට අනුව ඔහු යෝජනා කර තිබෙන්නේ, පවතින තත්ත්වය හමුවේ රජයට බරක් නොමැතිව ජනතාවට සහන සැලසීම සඳහා සේවක අර්ථ සාධක අරමුදල යොදාගත හැකි බවයි.

මේ වන විට රුපියල් බිලියන 2500 ක් ඉක්මවා ඇති එම අරමුදලෙන්, මෙම වැඩසටහන සඳහා රුපියල් බිලියන 500 ක් වැනි මුදලක් වැය වනු ඇතැයි කබ්රාල් මහතා පෙන්වාදී තිබේ.

ඒ තුළින් ලක්ෂ 25ක් වන සාමාජිකයින් සඳහා රජයට කිසිදු බරක් නොමැතිව සහන සැලසිය හැකි බව ඔහුගේ අදහසයි.

එම මුදල් ආර්ථිකයට ගලායෑමට සැලැස්වීම තුළින් මේ මොහොතේ ණය වාරික ආදිය ගෙවා ගත නොහැකිව සිටින ජනතාවට මහත් පිටුවහලක් වනු ඇති බව ද අජිත් නිවාඩ් කබ්රාල් මහතා පෙන්වා දෙයි.

ආර්ථිකයට මෙවැනි මුදලක් අලුතින් ගලා ඒම තුළ ජනතාවගේ පරිභෝජන හා ආයෝජන ශක්තිය වර්ධනයවීමෙන් ආර්ථිකයේ ක්ෂණික පිබිදීමක් ඇති වන බව ඔහුගේ අදහසයි.

ඒ අනුව මෙයින් අදහස් වෙන්නෙ “සේවකයාගේ සාක්කුවෙන්ම අරන් වියදමි කරනවා යන්නයි”… “බැංකුවේ තියෙන සල්ලි අරන් මාස දෙකක් කන්න” කියන කතාවයි. නමුත් ලෝකයේ අනෙක් රටවල් පිළිබඳව සළකා බැලීමේදී ඔවුන් තම දළ ජාතික නිෂ්පාදනවලින් බොහෝ ප්‍රමාණයක් මෙම කොරෝනා අවධානමෙන් මුදවාගැනීමට යොදවා තිබේ. සිංගප්පූරුව තම දළ ජාතික නිෂ්පාදන වලින් 11% ක් ද බහරේන් 14%ක් ද ජර්මනිය 22% ක්ද යනාදී ලෙස යොදවා තිබේ.නමුත් ශ්‍රි ලංකාවේ 0.3 කි.එනම් ඇස්තමේන්තු මුදල වන්නේ ඩොලර් මිලියන 300 කි. නමුත් එම මුදල මෙම අවධානමෙන් රට මුදවාලීම සඳහා ප්‍රමාණවත් වන්නේද යන්න ගැටලුසහගතය.ඒ අනුව ආණ්ඩුවේ නව සැළසුම වන්නේ සේවක අර්ථසාධක අරමුදල මේ සඳහා යොදවාලීමයි. කෙසේනමුදු මෙම සේවක අර්ථසාධක අරමුදල හරහා රටේ ආර්ථිකයට යම් උත්තේජනයක් ලබාගතහැකිවුවත් මෙම සේවක අර්ථසාධක අරමුදල නිදහස් කිරීම හරහා සේවකයින්ට ඍජු බලපෑමක් ඇති වේ.

සේවක අර්ථසාධකයේ ඉතුරුකර තිබෙන මුදල් 95% ක ප්‍රමාණයක් ආයෝජනය කර ඇත්තේ රජයේ බැඳුම්කර භාණ්ඩාගාර බිල්පත් තුළය.එබැවින් යම්කිසි මුදල් ප්‍රමාණයක් නැවත මෙම සේවකයින්ට ලබාදෙන්නේ නම් ඒ මුදල් රජයෙන් නැවත ලබාගතයුතු වේ.මේ තුළින් අපැහැදිලි වන කාරණය නම් අර්ථසාධක මුදල් පිටතට ගන්නේ කෙසේද යන්නයි.එබැවින් මෙම තර්කය පිළිබඳව නැවත සිතාබැලිය යුතුමය.

විශේෂයෙන් ම මෙම යෝජනාව ඉදිරිපත් කරන පුද්ගලයා මහබැංකුවේ අධිපති වී සිටින කාලයේදී සේවක අර්ථසාධක අරමුදලේ මුදල් භාවිතය ගැන බොහෝ ප්‍රශ්න විගණනයෙන් ඉදිරිපත් කර තිබේ.එසේම අර්ථසාධක අරමුදල යනු රජයේ මුදල් නොවේ.මෙය රටෙි සේවකයින්ගේ මුදලකි.මෙය ඔවුන්ගේ විශ්‍රාම ජීවිතය ගත කිරීමට තිබෙන මුදලයි.එබැවින් මෙම මුදල යම් විදියකට භාවිතා කරන්නේ නම් සේවකයිනගේ අනුමැතිය අනිවාර්යයෙන් ම ලබාගත යුතුය.

ඒ අනුව මාගේ අදහස නමි මෙම අවස්ථාවේදී කළයුතු උචිතම දේ වන්නේ පක්ෂ පාට භේදයකින් තොරව මෙම ගැටලුවට යථාර්ථවාදී විසදුමක් ඉදිරිපත් කිරීම බවයි.

ජීවිතය ජයගන්න ක්‍රම 06ක්..

පැමිණෙන අභියෝගවලට මුහුණ දෙන්නට ශක්තිමත් මනසක් අත්‍යවශ්‍ය ය. සාර්ථක ජීවිතයක් උදාකර ගැනීමට උත්සාහ දරන පුද්ගලයකුට, මනසේ සිතුවිලිවල ස්වභාවය බෙහෙවින් ම වැදගත් ය. ශක්තිමත් මනසක් පවත්වාගෙන යමින් , ජීවිතය ජය ගැනීමට කටයුතු කළ යුත්තේ කෙසේද යන්න පිළිබඳ , විද්‍යාත්මකව සනාථ කරන ලද කරුණු හයකි මේ.

1. ඒකායන අරමුණකින් කටයුතු කිරීම

දැනුම යනු පුද්ගලයකුගේ ශක්තියයි. තමා පෙර සිටි ආකාරය සහ තමා අද ජීවත්වන ආකාරය පිළිබඳ වඩාත් සාධනීයව සිතා බලා, එම කාල පරාසය තුළදී තමාගෙන් සිදුවූ අඩුපාඩුකම් විසඳා ගැනීමටත්, ඒ ආකාරයට ක්‍රියා කරමින් සමාජයට වැඩදායි පුද්ගලයකු ජීවත් වීමටත් උත්සාහ දරන්නේ නම්, ජීවිතය ජය ගැනීමට පුළුවන. ඒ සඳහා තමාගේ උනන්දුව අත්‍යවශ්‍ය ය. උත්සාහය සහ ධෛර්ය මනසේ තැන්පත් කර ගනිමින්, අ‍නෙකාගේ අදහස්වලට ගරු කරමින් ජීවත් වනවානම්, ජීවිතය සාර්ථකව ගත කිරීමට ඉඩ ප්‍රස්ථාව ලැබේ. එපමණක් නොව, තමා යනු කවරෙක් ද යන්න පිළිබඳ තමන් තුළ පවතින අවබෝධය මෙ‍හිදී වඩාත් වැදගත් ය. එසේ ම, දවසින් දවස එක්වන අත්දැකීම් මඟින් ජීවිතයට යමක් එක්කර ගැනීම ද වඩාත් ම සුදුසු ය.

2. තමා පිළිබඳ අවතක්සේරුවෙන් නොසිතීම

තමා කවරෙක්ද? තමාට අවශ්‍ය දෑ මොනවාද? යන්න පිළිබඳ සිතේ රූපයක් මවා තබා ගැනීම ඉතාමත් ම වැදගත් ය. තමා පිළිබඳ අවතක්සේරුවෙන් නොසිතා, තමන්ගේ සහජ හැකියා මඟින් තමන්ට කළ හැකි වැඩ කටයුතු ප්‍රමාණය පිළිබඳ තීරණයක් ගැනීමට තමන්ට හැකියාවක් තිබිය යුතු ය. යම් ගැටලුවක් පැමිණිවිට විචාරශීලීව බලා , එයට විසැඳුම් සොයන්නට උනන්දු විය යුතු අතර, සාධාරණ තීරණ ගැනීමට තමාට පුළුල් අවබෝධයක් තිබිය යුතු ය. තමාට අවැසි දේ පිළිබඳ ගවේෂණය කරමින්, නිවැරැදි දේ කිරීමට සැම විටම වගබලා ගත යුතු ය.

3. අනුවේදනීයත්වය, ස්වයං ආදරය හා ආරක්ෂාව

තමන් තමාටම ආදරය විය යුතු අතර, තමා පිළිබඳ සංවේදීත්වයක් ඇතිකර ගත යුතු ය. එසේ නොමැතිකම හේතුවෙන් සියදිවි හානිකර ගැනීම් වැනි තත්ත්ව ඇතිවිය හැකි ය. ප්‍රථමයෙන්ම පුද්ගලයෙක් තමාට ආදරය දැක්විය යුතු අතර, පසුව සමාජයට ද ආදරය, රැකවරණය සහ සංවේදීත්වය දැක්විය යුතු ය. තමා පිළිබඳ ඇතිකර ගන්නා අවබෝධය තුළින් අන් අයගේ ආකර්ෂණය දිනා ගැනීමට සමත් පුද්ගලයකු විය යුතු ය. තමන්ට පැමිණෙන අභියෝග, ප්‍රශ්න ඉතාමත් ඉවසීමකින් යුක්තව විසඳා ගැනීමට හැකි වන්නේ, තම මනස ආදරයෙන් සහ සංවේදීත්වයෙන් පරිපූර්ණ වූ විට ය. නූතනයේ පවතින ඝාතන, මිනීමැරුම් ආදී අපරාධවලට මිනිසුන් පෙලඹෙන්නේ, තම දිවියේ වටිනාකම පිළිබඳ අවබෝධයක් නොමැති නිසාවෙ ය.

4. තමා තමාටම විශ්වාසවන්ත වීම

මේ සාධකය ද, තමාගේ මනසෙහි ශක්තිමත් භාවය රඳා පවත්වා ගැනීමටත්, පෞරුෂය වර්ධනය කර ගැනීමට හා ආත්ම ශක්තිය දියුණු කර ගැනීමට උපකාරී වේ. තමන්ට ලැබෙන අභියෝගවලට සාර්ථකව මුහුණදීම, තමන්ගේ අරමුණු , ඉලක්ක කරා පහසුවෙන් ගමන් කිරීමට ද ස්වයං විශ්වාසවන්ත භාවය වඩාත් වැදගත් ය. සමාජය තුළ ජීවත් වීමේදී ද එකිනෙකා සමඟ සහජීවනයෙන් ජීවත් වන්නට විශ්වාසවන්තභාවය අතිශයින් ම වැදගත් වන අතර, එමඟින් තම මිත්‍රයන් ප්‍රමාණය වැඩිකර ගැනීමට ද හැකියාව ලැබේ. තමන් තමන්ට විශ්වාසවන්ත වනවිට දී සමාජය ද තමන් විශ්වාස කරයි. ඒ හේතුවෙන් තමාට අවංකවම ස්වයං ආඩම්බරයක් උරුම කර ගැනීමට පුළුවන. මෙහිදී වඩාත් වැදගත් වන්නේ, තමා කවරෙක් ද යන්න පිළිබඳවිශ්වාසවන්තභාවය සිත තුළ රඳවා ගැනීම ය.

5. ජීවත් වීමේ අවශ්‍යතාව අවබෝධ කර ගැනීම

මනා පෞරුෂයකින් ජීවත් වන පුද්ගලයාට , තමා මේ ජීවත් වන්නේ කිනම් අරමුණු වෙනුවෙන්ද යන්න පිළිබඳ දැඩි අවධානය යොමු කළ හැකි ය. එවිට එම පුද්ගලයාට ඉතාමත් ම පහසුවෙන් පවුල් ජීවිතය ගොඩනගා ගැනීමට හැකියාව ලැබේ. එසේ ම, අනාගත අරමුණු සාර්ථකව ඉටුකර ගැනීමට මේ සාධකය බෙහෙවින් ම බලපායි. තමන් පරිභෝජනය කරනා මුදල් ප්‍රමාණය අරපිරිමැස්මෙන් භාවිතයට ගන්නේ කෙසේ ද? තමන්ට වියදම් කිරීමට හැකි ප්‍රමාණය කොපමණ ද? යන්න පිළිබඳ මනසෙහි අවබෝධයක් තිබිය යුතු ය. තමන් කැමති දේ නොව, තමන්ට අවශ්‍ය දේ පිළිබඳ අවධානය යොමු කරනවා නම් , ජීවිතය සාර්ථක කර ගැනීමට පුළුවන.

6. මානසිකව ශක්තිමත් වීම

පුද්ගලයකු මනස ශක්තිමත් කර ගැනීමට ක්‍රියා කරනවා නම්, අනිවාර්යයෙන්ම එම පුද්ගලයා මානසික වශයෙන් සුවතාවක් ලබයි.එමඟින් ජීවිතයේ අභියෝග ඉතාමත් ම සංයමයෙන් යුතුව ජය ගැනීමට පුළුවන. දවසින් දවස අපගේ සිත තුළ ධනාත්මක සිතිවිලි වඩවා ගන්නේ නම්, එබඳු ආකල්ප, අභිප්‍රායයන් වර්ධනය කර ගන්නේ නම් , ජීවිතය දිනෙන් දින ම ශක්තිමත් කර ගැනීමට හැකි ය. පෙර කළ වැරැදි, අඩුපාඩු නිවැරැදි කර ගනිමින්, යළිත් එම වැරැද්ද නොකර සිටීමට මනස ශක්තිමත් කර ගන්නවා නම්, ජීවිතය ජයගත හැකි ය. ශක්තිමත් මනසක් ඇති පුද්ගලයා ජීවිතයට පැමිණෙන ප්‍රශ්න මඟහැර දමා නොයයි. මානසික ශක්තිය දිනෙන් දින වැඩි දියුණු කර ගැනීම, වඩාත් සාර්ථක ජීවිතයකට මඟ පාදයි.